१० जेष्ठ २०७९, मंगलवार

निर्वाचन लक्षित सुरक्षा व्यवस्था प्रभावकारी छः प्रजिअ अर्याल

दमौली, बैशाख २७

तनहूँका प्रमुख जिल्ला अधिकारी विश्वप्रकाश अर्यालले जिल्लामा निर्वाचन लक्षित सुरक्षा व्यवस्था प्रभावकारी बनेको बताएका छन् । निर्वाचनलाई स्वच्छ, निश्पक्ष र धाधलि रहित बनाउन प्रशासन प्रतिबद्ध रहेको प्रजिअ अर्यालको भनाई छ ।

अनौपचारिक क्षेत्र सेवा केन्द्र (इन्सेक) गण्डकी प्रदेशको कार्यालयले मंगलबार जिल्लाको मानव अधिकारको अवस्था र निर्वाचन पूर्व अनुगमनको क्रममा प्रजिअ अर्यालले नेपाली सेनाको कमान्डमा चार वटै सुरक्षा निकाय प्रभावकारी रुपमा परिचालन भईरहेको बताए । राजनीतिक दलहरुको पटक पटक बैठक राखेर निर्वाचन आचार संहिताको प्रभावकारी पालनाको लागि जोड दिईएको र निर्वाचन आचार संहिता उल्लंघन भएको देखिए त्यस्तो अवस्थामा सम्बन्धितलाई सचेत गराईएको बताए ।

निर्वाचनलाई भय रहित, स्वच्छ, निश्पक्ष र धाधलि रहित बनाउन सुरक्षा निकाय, कर्मचारी, राजनितिक दल सबै प्रतिबद्ध रहेको उनको भनाई छ । स्थानीय विशेष सुरक्षा व्यवस्था गरी निर्वाचन कार्यालय, उम्मेदवार, निर्वाचन सामाग्री, दलको प्रचारप्रसार, मतदान सुरक्षा, मतदान केन्द्र सुरक्षा गरी तीन तहमा सुरक्षा प्रबन्ध गरिएको प्रजिअ अर्यालले बताए ।

जिल्लाका १३६ वटै मतदात केन्द्र र २९७ वटै मतदान स्थलमा खटिने कर्मचारीको व्यवस्थापन भई कर्मचारीहरु आफ्नो मतदान केन्द्रमा पुग्ने क्रम जारी रहेको प्रजिअ अर्यालले बताए । एउटा मतदान केन्द्रमा २४ जनासम्मको सुरक्षाकर्मी परिचालन गरिने प्रजिअ अर्यालले बताए ।

अनुगमनको क्रममा क्रममा इन्सेक गण्डकी प्रदेश संयोजक शिव खकुरेलले इन्सेकले मानव अधिकारको संरक्षणमा कार्य गर्दै आएको र निरन्तर रुपमा निर्वाचनको पर्यवेक्षणको काम गरिरहेको जानकारी गराए । सो टोलीले जिल्लाका पर्यवक्षेकहरुसँग पनि अन्तरक्रिया गरेको थियो । सो क्रममा राष्ट्रिय निर्वाचन पर्यवेक्षण समिति (नियोक) तनहूँकी अध्यक्ष सोनी शर्माले पर्यवेक्षकहरुले निर्वाचन आचार सहिताको पालनाको अनुगमन र समग्र निर्वाचन कार्यक्रमको अनुगमन गरिरहेको बताईन् ।

इन्सेक गण्डकी प्रदेश कार्यालयका संयोजक शिव खकुरेल, इन्सेकका कार्यक्रम अधिकृत सवनम शर्मा, राष्ट्रिय निर्वाचन पर्यवेक्षण समिति (नियोक) का गण्डकी प्रदेश समितिका सदस्य प्रेम सोम्याङ, इन्सेक जिल्ला प्रतिनिधि प्रकाशचन्द्र भट्टराई, नियोक तनहूँ जिल्ला अध्यक्ष सोनी शर्मा सहितको टोलीले जिल्लामा मानव अधिकार र निर्वाचन पूर्व अनुगमन गरेका थिए ।

प्रतिक्रिया दिनुहोस्
धेरै पढिएको